„НОВА МАКЕДОНИЈА” Јули 2002 год.

Во употреба репетитор на Мобимак на соларна енергија и ветер

Моменталната покриеност со ГСМ согнал е 97 % од населението, а 89 % од територијата

Националниот мобилен оператор АД Мобимак вчера во близина на Неготино ја пушти во употреба првата репетиторска станица за мобилна телефонија во Македонија, која целосно се напојува со енергија од алтернативни енергетски извори, односно од сончева енергија и ветер. Оваа базна станица, вредна 10.000 €, годишно обезбедува 150 - 180 KV струја. Таа е инсталирана со помош на домашната компанија СИЕТО и има цел да се подобри квалитетот на ГСМ сигналот на делот од меѓународниот автопат кој минува покрај Неготино како и неговата поблиска околина.
Ваквата базна станица, со алтернативно напојување на енергија и за ваква намена, е прва не само во Македонија, туку и меѓу првите во регионот, истакнува Роберт Орданоски, извршен директор на Одделот за технички инжинеринг при Мобимак. Во рамките на проширувањето на ГСМ радиомрежата кај нас, една од нашите основни цели е и покривањето на главните патишта, туристичките центри, градовите и руралните средини.

- На оваа локација во близина на Неготино, на делот од автопатот кон Грција, кон која за Олимписките игри 2004 година се очекува голем сообраќај, забележавме послаб прием на сигналот. Во студијата направена за оваа цел констатиравме дека овде годишно имаме повеќе од 250 сончеви денови, па затоа и решивме да поставиме базна станица и репетитор што ќе работат на сончева енергија и ветер, а кога ги нема нив се активираат батериите и ја даваат потребната енергија. Ваквото решение е и поедноставно и поекономично, а има и свои големи предности и од еколошки аспект, вели Орданоски, кој додава дека сега квалитетот на сигналот е одличен, со што овој зафат ја оправдал целта.

Заради подобро покривање на државата Мобимак досега има поставено 330 базни станици на 225 локации и 20 ГСМ репетитори, со што овозможува покриеност на населението од 97% и на територијата од 89 %. Се планира покриеноста до крајот на годината да достигне 98 и 95 %. Во последно време, акцент се става на подобра покриеност на патните правци, при што се опфаќаат и такви “дупки”, како што се Катлановската и Демиркаписката клисура, делот меѓу Градско и Неготино, регионалните патишта како Кочани - Македонска Каменица. А се зајакнува и покривањето со сигнал на туристичките центри како Охрид, со станица во Пештани, потоа неделава на североисточниот дел на Скопје, од населбата Ченто кон Стајковци, а наскоро и меѓу Драчево и Марков манастир.

 

Другите за нас: